Madhyamam daily 17-11-2010കാസര്‍കോട്: ജില്ലയില്‍ പത്തുവര്‍ഷമായി എന്‍ഡോസള്‍ഫാന്‍ കെടുതി അനുഭവിച്ചവരുടെ യഥാര്‍ഥ കണക്ക് ശേഖരിക്കാനുള്ള ആരോഗ്യവകുപ്പ് സര്‍വേ പൂര്‍ണമായില്ല. കഴിഞ്ഞ രണ്ടുദിവസമായി 500ഓളം ആരോഗ്യപ്രവര്‍ത്തകര്‍ 11 പഞ്ചായത്തുകളില്‍നിന്ന് വിവരം ശേഖരിച്ചപ്പോഴും അധികൃതര്‍ യഥാര്‍ഥ കണക്ക് തിട്ടപ്പെടുത്താനാവാതെ പ്രതിസന്ധിയിലായി. ഇത് കാരണം സര്‍വേ നടപടി വീണ്ടും ഒരാഴ്ചത്തേക്ക് നീട്ടി.
രോഗബാധിതര്‍ നാലായിരത്തോളം വരുമെന്നായിരുന്നു സര്‍വേ കഴിഞ്ഞപ്പോഴുള്ള പ്രാഥമിക വിവരം. എന്നാല്‍, തിങ്കളാഴ്ച സര്‍വേ സംഘങ്ങളുടെ റിപ്പോര്‍ട്ട് ക്രോഡീകരിച്ചപ്പോള്‍ രണ്ടായിരത്തോളം എന്ന നിലയില്‍ എണ്ണം ചുരുങ്ങി. ഇത് ശാസ്ത്രീയ കണക്കല്ല. എന്നിട്ടും അധികൃതര്‍ വിവരം ക്രോഡീകരിച്ച് സമര്‍പ്പിക്കാനുള്ള തിടുക്കത്തിലാണ്.
11 പഞ്ചായത്തുകളിലെയും മുഴുവന്‍ വീടുകളിലും ചെന്ന് വിവരം ശേഖരിക്കാനായിരുന്നു സര്‍വേയിലൂടെ ഉദ്ദേശിച്ചത്. വിവിധ ജില്ലകളില്‍നിന്ന് വിളിച്ചുവരുത്തി ഉദ്യോഗസ്ഥര്‍ക്ക് പരിശീലനവും നല്‍കി. പക്ഷേ, രണ്ടുദിവസത്തിനകം 75 ശതമാനം വീടുകള്‍ മാത്രമേ സന്ദര്‍ശിക്കാന്‍ കഴിഞ്ഞുള്ളൂ. മലയിടുക്കുകള്‍ താണ്ടിയുള്ള സര്‍വേക്ക് വലിയ സന്നാഹം ഒരുക്കാതെ വഴിപാട് നടപടികളിലൊതുക്കി എന്നാണ് പരാതി. ഇനിയും വിവരം ശേഖരിക്കാനുള്ള 25 ശതമാനം വീടുകളിലെയും കണക്ക് കൂടി ചേര്‍ത്ത് മാത്രമേ യഥാര്‍ഥ വിവരം തിട്ടപ്പെടുത്താനാവുകയുള്ളൂ. അന്യജില്ലകളില്‍നിന്നുവന്ന സര്‍വേ അംഗങ്ങളെ തിങ്കളാഴ്ച തിരിച്ചയക്കുകയും ചെയ്തു. ജില്ലയിലെ ഉദ്യോഗസ്ഥര്‍ ഒരാഴ്ചക്കകം സര്‍വേ പൂര്‍ത്തിയാക്കിയാല്‍ മതിയെന്നാണ് നിര്‍ദേശം. പഞ്ചായത്തുകളിലെ വീട്ടുനമ്പര്‍ അനുസരിച്ചാണ് സര്‍വേ നടത്തിയത്. പക്ഷേ, ചില വിലാസത്തില്‍ കുടുംബങ്ങളെ കാണാനായില്ല. പത്തുവര്‍ഷത്തിനകം ഇവിടെനിന്ന് താമസം മാറ്റിയവര്‍ നിരവധിയാണ്. ഇവരുടെ വിവരം കൂടി ശേഖരിച്ച് ഇപ്പോള്‍ അവര്‍ താമസിക്കുന്ന സ്ഥലം കണ്ടുപിടിച്ചാലേ യഥാര്‍ഥ മരണ നിരക്കുപോലും തിട്ടപ്പെടുത്താനാവുകയുള്ളൂ.
ഓരോ വീട്ടിലെയും അംഗങ്ങള്‍, അവരുടെ ആരോഗ്യസ്ഥിതി, രോഗത്തിന്റെ സ്വഭാവം, സര്‍ക്കാര്‍ സഹായം കൈപ്പറ്റുന്നവരുടെ യഥാര്‍ഥ വിവരങ്ങള്‍, മരിച്ചവരുടെ ആശ്രിതര്‍ തുടങ്ങിയ വിവരങ്ങള്‍ സര്‍വേയില്‍ ശേഖരിക്കുന്നുണ്ട്. പരാശ്രയം ആവശ്യമുള്ള രോഗികള്‍ക്ക് സര്‍ക്കാര്‍ നല്‍കുന്ന സഹായം അനര്‍ഹര്‍ തട്ടിയെടുക്കുന്നുണ്ടോ എന്ന സംശയവും സര്‍വേയില്‍ പരിശോധിക്കുന്നുണ്ട്. രണ്ടുദിവസത്തെ പഠന റിപ്പോര്‍ട്ട് തിങ്കളാഴ്ച വൈകീട്ട് വരെയും ക്രോഡീകരിക്കാന്‍ കഴിഞ്ഞില്ല. മരിച്ചവരുടെ വിവരങ്ങള്‍ വാക്കാല്‍ എഴുതിവാങ്ങിയത് മാത്രമാണ്. അതിനാല്‍ യഥാര്‍ഥ മരണ നിരക്ക് തിങ്കളാഴ്ചയും സ്ഥിരീകരിച്ചില്ല. ഈ സാഹചര്യത്തിലാണ് കണക്ക് പൂര്‍ണമാക്കാന്‍ ഒരാഴ്ച കൂടി നീട്ടിയിരിക്കുന്നത്.
