കമല്‍സഹായ് വീണ്ടുമെത്തി, നിശ്ശബ്ദസുന്ദരിയെത്തേടി
Mathrubhumi news Posted on: 19 Apr 2010
എം. ബിലീന
പാലക്കാട്: നിശ്ശബ്ദതാഴ്‌വരയുടെ സൗന്ദര്യം ഒപ്പിയെടുക്കാന്‍ മൂന്ന് പതിറ്റാണ്ടുകള്‍ക്കുശേഷം കമല്‍സഹായ് വീണ്ടുമെത്തി. താഴ്‌വരയുടെ ശബ്ദമാകാനായിരുന്നു അന്ന് നിയോഗമെങ്കില്‍, ഇന്ന് ആ സ്വച്ഛത ഒപ്പിയെടുക്കാനാണെന്നുമാത്രം.
അണക്കെട്ടുപണിയാന്‍ നിര്‍മാണസാമഗ്രികള്‍ കയറ്റിക്കൊണ്ടുപോകുന്ന ട്രക്കുകള്‍ താഴ്‌വരയുടെ നിശ്ശബ്ദതഭേദിച്ചുതുടങ്ങിയകാലത്താണ് കമല്‍സഹായ് ഇവിടെയെത്തിയത് -1979ല്‍. സൈലന്റ്‌വാലിയില്‍ അണക്കെട്ടുപണിയാനുള്ള നീക്കം തകൃതിയായി നടക്കുന്ന സമയം. ഖുശ്‌വന്ത്‌സിങ് എഡിറ്ററായ 'ന്യൂഡല്‍ഹി മാഗസിനു' വേണ്ടി സൈലന്റ്‌വാലിയെക്കുറിച്ച് ഫോട്ടോഫീച്ചര്‍ തയ്യാറാക്കാനാണ് അന്ന് അദ്ദേഹം എത്തിയത്.
സൈലന്റ്‌വാലിയെ സംരക്ഷിക്കണമെന്ന് ആവശ്യപ്പെടാന്‍ അന്ന് കേരളത്തില്‍ കാര്യമായ പരിസ്ഥിതി പ്രസ്ഥാനങ്ങളൊന്നും മുന്നോട്ടുവന്ന് തുടങ്ങിയിരുന്നില്ല. ഒറ്റപ്പെട്ട ചില ശബ്ദങ്ങള്‍മാത്രം. വൈദ്യുതിക്ഷാമം പരിഹരിക്കാന്‍ അണക്കെട്ട് വേണമെന്ന വാദത്തിനായിരുന്നു അന്ന് മുന്‍തൂക്കം.
ആ സമയത്താണ് ഒ.വി. വിജയന്‍ സൈലന്റ്‌വാലിയെ രക്ഷിക്കാനായി ഡല്‍ഹിയില്‍നിന്ന് കമല്‍സഹായിയെ ഇങ്ങോട്ടയയ്ക്കാന്‍ ചരടുവലിച്ചത്. ഇലക്ട്രിസിറ്റി ബോര്‍ഡ് ചെയര്‍മാന്റെ ഒരു കത്തും സംഘടിപ്പിച്ച് കമല്‍സഹായ് സൈലന്റ്‌വാലിയിലെത്തി. ഒപ്പം പ്രശസ്ത റിപ്പോര്‍ട്ടറായ അയേഷാകാഗലും. വഴികാട്ടിയായത് കോഴിക്കോട് ശാസ്ത്രസാഹിത്യപരിഷത്തിലും മറ്റും പ്രവര്‍ത്തിച്ചിരുന്ന വിദ്യാര്‍ഥിയായ നമശിവായം. നമശിവായം ചുമട്ടുകാരനെന്ന ഭാവത്തിലാണ് ഇവരോടൊപ്പം നടന്നത്. സൈലന്റ്‌വാലി അണക്കെട്ടിനെതിരെ റിപ്പോര്‍ട്ടെഴുതാനാണ് ഇവര്‍ വന്നതെന്ന് ഇലക്ട്രിസിറ്റി ബോര്‍ഡിലെ ഒരു ഈച്ചപോലും അറിഞ്ഞില്ല.
ഒരാഴ്ചത്തേക്കാണ് വന്നതെങ്കിലും, താഴ്‌വരയുടെ സൗന്ദര്യം ഒപ്പിയെടുത്ത് സമയംകടന്നുപോയത് കമല്‍സഹായ് അറിഞ്ഞില്ല. 27 ദിവസം കഴിഞ്ഞാണ് അദ്ദേഹം കാട്ടില്‍നിന്ന് കയറിയത്. 15റോള്‍ ഫിലിം അപ്പോഴേക്കും ക്യാമറയിലൂടെ ഒഴുകിനീങ്ങിക്കഴിഞ്ഞിരുന്നു.
ഇതിനിടെ ഭരണകക്ഷിക്കാരായ തൊഴിലാളി സംഘടനക്കാര്‍ ഇവര്‍ 'ശത്രു'ക്കളാണെന്ന് മനസ്സിലാക്കി ക്കഴിഞ്ഞിരുന്നു. മണ്ണാര്‍ക്കാട്ട് ഇവര്‍ താമസിച്ചിരുന്ന ഗസ്റ്റ്ഹൗസ് സംഘടനക്കാര്‍ വളഞ്ഞെങ്കിലും നമശിവായത്തിന്റെ സഹായത്തോടെ കമല്‍സഹായും അയേഷയും രക്ഷപ്പെട്ടു.
അന്ന് ന്യൂഡല്‍ഹി മാഗസിനില്‍ 32 പേജിലാണ് സൈലന്റ്‌വാലിയെക്കുറിച്ചുള്ള കവര്‍‌സ്റ്റോറി അച്ചടിച്ചുവന്നത്. കമല്‍സഹായിയുടെ അപൂര്‍വ മനോഹരമായ ചിത്രങ്ങള്‍ പ്രകൃതിസ്‌നേഹികളുടെയും പരിസ്ഥിതിവാദികളുടെയും കണ്ണിലുടക്കി. ഡല്‍ഹിയിലെ രാഷ്ട്രീയനേതൃത്വത്തില്‍ വലിയ ചലനമുണ്ടാക്കാന്‍ ആ ചിത്രങ്ങള്‍ക്ക് കഴിഞ്ഞു. സൈലന്റ്‌വാലി അങ്ങനെത്തന്നെ നിലനിര്‍ത്തണമെന്ന് ഇന്ദിരാഗാന്ധി തീരുമാനമെടുത്തതിനുപിന്നില്‍ ഈ ലേഖനവും ചിത്രങ്ങളുമാണ് തുടക്കമായതെന്ന് കരുതപ്പെടുന്നു.
എന്തായാലും സൈലന്റ്‌വാലിയെ തകര്‍ത്തുകൊണ്ട് അണക്കെട്ടുവന്നില്ല. താഴ്‌വര സംരക്ഷിക്കപ്പെട്ടു... ഇപ്പോള്‍ നീണ്ട 31 വര്‍ഷം കടന്നുപോയിരിക്കുന്നു. ഒരിക്കല്‍ക്കൂടി കമല്‍സഹായ് എത്തി, അറുപതിനോടടുത്തിട്ടും ചുറുചുറുക്കോടെ കൈയില്‍ ഡിജിറ്റല്‍ ക്യാമറയുമായി താഴ്‌വരയിലൂടെ ഊളിയിടാന്‍. 'ഇതൊന്നും എന്റെ വിജയമല്ല. വലിയ നേതാക്കള്‍ ഇല്ലെങ്കിലും സാധാരണക്കാരായ ആളുകള്‍ വിചാരിച്ചാല്‍ പ്രകൃതി സംരക്ഷിക്കപ്പെടുമെന്നതിന് തെളിവാണ് സൈലന്റ്‌വാലി' -അദ്ദേഹം വിനയത്തോടെ പറയുന്നു
