വ്യത്യസ്തമായ സിനിമകള്‍ക്കൊപ്പം പ്രേക്ഷക പങ്കാളിത്തവും വളര്‍ന്നുവരണം

Mathrubhumi Posted on: 30 Oct 2010

ചിറ്റൂര്‍: വ്യത്യസ്തമായ സിനിമകള്‍ ഉണ്ടാകുന്നതോടൊപ്പം അവ പ്രേക്ഷകരിലേക്ക് എത്തുകകൂടി ചെയ്താലെ ഇന്ത്യന്‍ സിനിമാരംഗം വിജയിക്കുകയുള്ളൂവെന്ന് ചലച്ചിത്ര അക്കാദമി ചെയര്‍മാന്‍ കെ.ആര്‍.മോഹനന്‍ പറഞ്ഞു. കേരള ചലച്ചിത്ര അക്കാദമി ചിറ്റൂര്‍ ചിത്രാഞ്ജലി തിയേറ്ററില്‍ ഒരുക്കുന്ന 7-ാമത് ദേശീയ ചലച്ചിത്രോത്സവം ഉദ്ഘാടനം ചെയ്യുകയായിരുന്നു അദ്ദേഹം.

ഇന്ത്യന്‍ സിനിമയുടെ പുത്തന്‍ പ്രവണതകളെക്കുറിച്ച് പുതിയതലമുറ ബോധവാന്മാരാകണമെന്നും അദ്ദേഹം പറഞ്ഞു. കെ.അച്യുതന്‍ എം.എല്‍.എ. അധ്യക്ഷനായി. ചടങ്ങില്‍ അവാര്‍ഡ് ജേതാക്കളായ ഔസേപ്പച്ചന്‍, പട്ടണം റഷീദ്, കെ.എം.മധുസൂദനന്‍, അസ്‌ന അസ്‌ലി, ദീപു ഉണ്ണി, ജയകുമാര്‍, മനോജ് കണ്ണോത്ത്, പ്രമോദ്, വി.കെ.ജോസഫ്, ജയകുമാര്‍ എന്നിവരെ ആദരിച്ചു.

ചലച്ചിത്ര അക്കാദമി പ്രസിദ്ധീകരിച്ച സിനിമകളെക്കുറിച്ചുള്ള കൈപ്പുസ്തകം കളക്ടര്‍ കെ.വി.മോഹന്‍കുമാര്‍ പാഞ്ചജന്യം ഫിലിം ക്ലബ്ബ് സെക്രട്ടറി രൂപേഷിന് നല്‍കി പ്രകാശനംചെയ്തു. ജി.പി.രാമചന്ദ്രന്‍ സ്വാഗതവും ചലച്ചിത്ര അക്കാദമി സെക്രട്ടറി ഡോ. കെ.എസ്.ശ്രീകുമാര്‍ നന്ദിയും പറഞ്ഞു.

ശ്യാം ബെനഗലിന്റെ മന്ദന്‍, രഞ്ജിത്തിന്റെ പാലേരി മാണിക്യം: ഒരു പാതിരാ കൊലപാതകത്തിന്റെ കഥ, ചേരന്റെ പൊക്കിഷം എന്നീ സിനിമകള്‍ പ്രദര്‍ശിപ്പിച്ചു.

സിനിമകളിലെ സ്ത്രീ സാന്നിധ്യത്തെക്കുറിച്ചുള്ള ഫോട്ടോ പ്രദര്‍ശനവും നടന്നു. മേള നവംബര്‍ 2ന് സമാപിക്കും.

സി.പി.എം. കോട്ടകള്‍ വീണു Mathrubhumi Posted on: 28 Oct 2010

ഷൊറണൂര്‍: കേരളം ഉറ്റുനോക്കിയ ഷൊറണൂര്‍ നഗരസഭയില്‍ ആര്‍ക്കും ഭൂരിപക്ഷം നേടാനായില്ല. നഗരസഭ നിലവില്‍വന്നതുമുതല്‍ സി.പി.എമ്മിന്റെ കുത്തകയായിരുന്ന ഷൊറണൂര്‍ നഗരസഭ അവര്‍ക്ക് നഷ്ടപ്പെട്ടു. എന്നാല്‍ സി.പി.എമ്മിനെ വെല്ലുവിളിച്ച എം.ആര്‍. മുരളിയുടെ ജനകീയവികസന സമിതിക്കും കോണ്‍ഗ്രസ്സിനും മുഖം രക്ഷിക്കാനായെന്നതൊഴിച്ചാല്‍ വലിയ മുന്നേറ്റം നടത്താനായിട്ടില്ല. സി.പി.എം. കോട്ടയായിരുന്ന ഒറ്റപ്പാലത്തും സി.പി.എം. വീണു.

33 വാര്‍ഡുള്ള ഷൊറണൂര്‍ നഗരസഭയില്‍ ഇടതുമുന്നണി 13 സീറ്റുനേടി ഏറ്റവുംവലിയ ഒറ്റക്കക്ഷിയായി. സി.പി.എമ്മിന് 12 ഉം സി.പി.ഐ.ക്ക് ഒന്നും വാര്‍ഡുകളാണ് കിട്ടിയത്. കോണ്‍ഗ്രസ്സും ജനകീയവികസനസമിതിയും എട്ട് വാര്‍ഡില്‍വീതം ജയിച്ചു. മൂന്നിടത്തുജയിച്ച് ബി.ജെ.പി. കരുത്ത് തെളിയിച്ചു. ഒരുസീറ്റില്‍ ജയിച്ച എസ്.ഡി.പി.ഐ. എല്ലാവരെയും ഞെട്ടിച്ചു. ഈ വാര്‍ഡില്‍ സി.പി.എം. മൂന്നാംസ്ഥാനത്തായി.

വാശിയേറിയ ചതുഷ്‌കോണമത്സരത്തിന് സാക്ഷ്യംവഹിച്ച ഷൊറണൂരില്‍ പല പ്രമുഖരും കാലിടറി വീണു.

എന്നാല്‍ ജെ.വി.എസ്. നേതാവ് എം.ആര്‍. മുരളി, കെ.പി.സി.സി. നിര്‍വാഹകസമിതി അംഗം വി.കെ. ശ്രീകണ്ഠന്‍, സി.പി.എമ്മിന്റെ വൈസ് ചെയര്‍മാന്‍ എസ്. കൃഷ്ണദാസ് എന്നിവര്‍ ജയിച്ചു.

മുന്‍ നഗരസഭാ ചെയര്‍മാനും ജെ.വി.എസ്. നേതാവുമായ എം. നാരായണന്‍, കെ.പി.സി.സി. അംഗം വി.കെ. ശ്രീകൃഷ്ണന്‍, സി.പി.എമ്മിന്റെ ചെയര്‍മാന്‍ സ്ഥാനാര്‍ഥി സി.ഐ.ടി.യു. സംസ്ഥാനകമ്മിറ്റി അംഗം ആര്‍.ജി. പിള്ള എന്നിവരാണ് പരാജയപ്പെട്ട പ്രമുഖര്‍.

നേരിയ ഭൂരിപക്ഷത്തിനാണ് ചില വാര്‍ഡുകളില്‍ സി.പി.എമ്മിന് വിജയംനേടാനായത്. ആറാം വാര്‍ഡില്‍ 10 വോട്ടിനും 21-ാം വാര്‍ഡില്‍ അഞ്ച് വോട്ടിനുമാണ് സി.പി.എം. സ്ഥാനാര്‍ഥികള്‍ വിജയം നേടിയത്. മൊത്തം 20 വാര്‍ഡിലാണ് ജനകീയവികസനസമിതി മത്സരരംഗത്തുണ്ടായിരുന്നത്. സ്വാധീനമേഖലകളില്‍ വിജയം കൈവരിക്കാന്‍ ഏറെക്കുറെ ജെ.വി.എസ്സിന് കഴിഞ്ഞു. എന്നാല്‍ മുന്‍ നഗരസഭാ ചെയര്‍മാന്‍ എം. നാരായണന്‍, സിറ്റിങ് കൗണ്‍സിലര്‍മാരായിരുന്ന ഒ.പി. ഗോവിന്ദന്‍കുട്ടി, വിമല എന്നിവര്‍ പരാജയപ്പെട്ടത് ജെ.വി.എസ്സിന് തിരിച്ചടിയായി.

447 വോട്ടിന്റെ ഭൂരിപക്ഷത്തിലാണ് 23-ാം വാര്‍ഡില്‍ സിറ്റിങ് വൈസ് ചെയര്‍മാന്‍ എസ്. കൃഷ്ണദാസ് വിജയിച്ചത്. അതേസമയം ചെയര്‍മാന്‍ സ്ഥാനത്തേക്ക് പരിഗണിച്ചിരുന്ന സി.ഐ.ടി.യു. സംസ്ഥാനകമ്മിറ്റിയംഗം കൂടിയായ ആര്‍.ജി. പിള്ള 112 വോട്ടിന് 28-ാം വാര്‍ഡില്‍ പരാജയപ്പെട്ടത് കനത്ത തിരിച്ചടിയായി. എല്‍.ഡി.എഫ്. സ്വതന്ത്രയായി 17-ാം വാര്‍ഡില്‍ മത്സരിച്ച രാധാലക്ഷ്മിക്ക് 68 വോട്ട് മാത്രമാണ് നേടാനായത്.

കെ.പി.സി.സി. അംഗവും സിറ്റിങ് കൗണ്‍സിലറുമായിരുന്ന വി.കെ. ശ്രീകൃഷ്ണന്‍ 42 വോട്ടിന് 13-ാം വാര്‍ഡില്‍ പരാജയപ്പെട്ടു. രണ്ടാം വാര്‍ഡില്‍ ആറ് വോട്ടിന്റെ ഭൂരിപക്ഷത്തിനാണ് കോണ്‍ഗ്രസ് സിറ്റിങ് കൗണ്‍സിലര്‍ പി. മുഹമ്മദ് കടന്നുകൂടിയത്.

2008 ഡിസംബറില്‍നടന്ന ഉപതിരഞ്ഞെടുപ്പില്‍ സി.പി.എമ്മിന്റെ എട്ട് സ്ഥാനാര്‍ഥി പരാജയപ്പെട്ടിരുന്നു. എം.ആര്‍. മുരളിയുടെ നേതൃത്വത്തില്‍ ഒമ്പത് അംഗങ്ങള്‍ കൗണ്‍സിലര്‍സ്ഥാനം ഉപേക്ഷിച്ച് തിരഞ്ഞെടുപ്പിനെ നേരിടുകയായിരുന്നു.

ഒറ്റപ്പാലത്ത് ആറ് സീറ്റ് പൊരുതിനേടി സി.പി.എം. വിമതപ്പട നടത്തിയ തേരോട്ടത്തില്‍ മുന്‍ നഗരസഭാ ചെയര്‍മാന്‍ കെ.പി. രാമരാജനടക്കമുള്ളവര്‍ക്ക് അടിതെറ്റി. വിമത വിഭാഗത്തിലെ എം. മുരളിയാണ് 82 വോട്ടിന് രാമരാജനെ തോല്‍പ്പിച്ചത്.

36 അംഗ നഗരസഭയില്‍ യു.ഡി.എഫും കഴിഞ്ഞ തവണത്തെക്കാള്‍ മുന്നേറിയപ്പോള്‍ ആര്‍ക്കും ഭൂരിപക്ഷമില്ലാത്ത തൂക്ക്‌സഭയായി.

2005 ല്‍ 22 സീറ്റ് ലഭിച്ച എല്‍.ഡി.എഫ്. 15 ലേക്ക് ഒതുങ്ങിയപ്പോള്‍ യു.ഡി.എഫ്. 7 ല്‍നിന്ന് 11 ലേക്ക് ഉയര്‍ന്നു. ബി.ജെ.പി. കഴിഞ്ഞതവണത്തെപ്പോലെ നാല് സീറ്റ് നിലനിര്‍ത്തി. കേവലഭൂരിപക്ഷത്തിന് 17 സീറ്റ് വേണമെന്നതിനാല്‍ ആര് ഭരിക്കും എന്നത് അനിശ്ചിതാവസ്ഥയിലായി. സി.പി.എം. വിമതരുടെയും ബി.ജെ.പി.യുടെയും സഹായംതേടേണ്ട അവസ്ഥയിലാണ് ഇവിടെ മുന്നണികള്‍.

കഴിഞ്ഞ കൗണ്‍സിലിലെ വൈസ് ചെയര്‍മാന്‍ സി. കുട്ടിശങ്കരന്‍, സ്റ്റാന്‍ഡിങ്കമ്മിറ്റി ചെയര്‍മാന്‍ വി.കെ. മോഹനന്‍, മുന്‍ കൗണ്‍സിലര്‍മാരായ ഇ.കെ. രാധാകൃഷ്ണന്‍, എം.പി. ലത എന്നിവരാണ് വിജയിച്ച പ്രമുഖ സി.പി.എം. വിമതര്‍. സ്റ്റാന്‍ഡിങ്കമ്മിറ്റി ചെയര്‍മാന്‍മാരായിരുന്ന ഇ. പ്രഭാകരന്‍, എ.പി. ഉമൈബാന്‍ എന്നിവര്‍ പരാജയപ്പെട്ടു. ശക്തമായ മത്സരം നടന്ന 23-ാം വാര്‍ഡില്‍ 2000-05 ലെ നഗരസഭാ വൈസ് ചെയര്‍മാനായിരുന്ന പി.കെ. പ്രദീപ്കുമാറിനെ മുന്‍ പ്രതിപക്ഷ നേതാവും ഡി.സി.സി. അംഗവുമായ എസ്. ശെല്‍വന്‍ 10 വോട്ടിന് പരാജയപ്പെടുത്തി. ശക്തമായ ത്രികോണമത്സരം നടന്ന നാലാംവാര്‍ഡില്‍ ബി.ജെ.പി. സംസ്ഥാനസമിതിയംഗവും മുന്‍ ജില്ലാ പ്രസിഡന്റുമായ കെ. ശിവദാസ് തോറ്റു.

നാലുവോട്ട് ഭൂരിപക്ഷത്തിന് സി.പി.എം. ഏരിയാകമ്മിറ്റിയംഗം സി. ശ്രീകുമാരനാണ് ഇവിടെ വിജയിച്ചത്. 20-ാം വാര്‍ഡില്‍ മത്സരിച്ച സി.പി.എം. വിമതര്‍ ആറിടങ്ങളില്‍ രണ്ടാം സ്ഥാനത്തെത്തി. പല്ലാര്‍മംഗലം വാര്‍ഡിലും കണ്ണിയമ്പുറം തെരുവിലും സി.പി.എമ്മിന്റെ പരാജയമുറപ്പാക്കാന്‍ വിമതസ്ഥാനാര്‍ഥികള്‍ക്ക് കഴിഞ്ഞു. ഇവിടെ രണ്ടിടത്തും കോണ്‍ഗ്രസ്സാണ് വിജയിച്ചത്.

കല്ലടിക്കോട്ട് കാട്ടാന വീണ്ടും കൃഷി നശിപ്പിച്ചു Mathrubumi Posted on: 28 Oct 2010

കല്ലടിക്കോട്: കല്ലടിക്കോടന്‍ മലകളില്‍നിന്നിറങ്ങിയ കാട്ടാന പ്രദേശത്തെ കാര്‍ഷികവിളകള്‍ നശിപ്പിച്ചു. വാക്കോട്, പറക്കലടി, പട്ടാണിക്കെട്ട് പ്രദേശങ്ങളില്‍ രാത്രിയെത്തിയ കൊമ്പനാനയാണ് വ്യാപകമായി കൃഷിനാശം വരുത്തിയത്.

എ.കെ. വിജയന്റെ റബ്ബര്‍ത്തോട്ടത്തോടുചേര്‍ന്നുള്ള 11 തെങ്ങ് കടപുഴക്കി മറിച്ചിട്ടു. തുപ്പനാട് ജമാലിന്റെ 25 വര്‍ഷമായി കായ്ക്കുന്ന തെങ്ങുകളും വേരോടെ പിഴുതിട്ടു. ഞാലിപ്പൂവന്‍-നാടന്‍ വാഴകളും 250ഓളം മൂപ്പെത്തിയ വാഴക്കുലയും ചവിട്ടിനശിപ്പിച്ചിട്ടുണ്ട്. ഇതോടെ പ്രദേശത്തെ കര്‍ഷകരും വീട്ടുകാരും ദുരിതത്തിലായി. രാത്രിയില്‍ ആനകളെപ്പേടിച്ച് ജനങ്ങള്‍ക്ക് പുറത്തിറങ്ങാന്‍കഴിയാത്ത സ്ഥിതിയാണ്. കഴിഞ്ഞ രണ്ടുമാസമായി കരിമ്പപഞ്ചായത്തിലും മുണ്ടൂര്‍പഞ്ചായത്തിലും കാട്ടാനകള്‍ രണ്ടുകോടി രൂപയുടെ നാശനഷ്ടം വരുത്തിയിട്ടുണ്ട്. വൈദ്യുതവേലി ചവിട്ടിമറിച്ചിട്ടാണ് കാട്ടാനകള്‍ കൃഷിയിടത്തിലേക്കെത്തുന്നത്. പാട്ടകൊട്ടിയും പടക്കംപൊട്ടിച്ചും പന്തംകൊളുത്തിയും കാട്ടാനകളെ ഓടിക്കാനുള്ള ശ്രമം പരാജയപ്പെട്ടതോടെ കര്‍ഷകര്‍ തങ്ങളുടെ ജീവനും കൃഷിയും എങ്ങനെ സംരക്ഷിക്കുമെന്നറിയാതെ വിഷമിക്കയാണ്.

രാത്രികാലങ്ങളില്‍മാത്രം എത്തിയിരുന്ന കാട്ടാനകള്‍ വൈകുന്നേരങ്ങളിലും ജനവാസകേന്ദ്രങ്ങളിലെത്താന്‍ തുടങ്ങിയതുമൂലം കുട്ടികളെ സ്‌കൂളില്‍പ്പോലും വിടാന്‍ മാതാപിതാക്കള്‍ പേടിക്കയാണ്. മരുതുംകാട്ടില്‍ പാട്ടത്തിനെടുത്ത 18 ഏക്കറില്‍ കൃഷിചെയ്തിരുന്ന സജിയുടെ പൈനാപ്പിള്‍ച്ചെടികളില്‍ 2500ഓളം എണ്ണം ഏഴ് കാട്ടാന വന്ന് നശിപ്പിച്ചിരുന്നു. കരിപ്പൂണിമല, കളപ്പാറ, പാങ്, കല്ലന്തോട്, ചെറുമല, കൂമന്‍കുണ്ട്, മീന്‍വല്ലം, കരിമല പ്രദേശങ്ങളിലും കാട്ടാനകള്‍ കൂട്ടായി കൃഷിനാശം വരുത്തുന്നുണ്ട്. കാട്ടാനകളെ പ്രതിരോധിക്കാന്‍ നടപടി സ്വീകരിക്കാന്‍ ഇനിയും അധികൃതര്‍ തയ്യാറായിട്ടില്ല

ചിറ്റൂര്‍ കോളേജില്‍ വൃക്ഷത്തൈകള്‍ നട്ടു

Posted on: 06 Oct 2010

ചിറ്റൂര്‍: ജനമൈത്രി പോലീസിന്റെയും കോളേജ് യൂണിയന്റെയും ആഭിമുഖ്യത്തില്‍ ചിറ്റൂര്‍ കോളേജ് പരിസരത്ത് വൃക്ഷത്തൈകള്‍ നട്ടു. പ്രിന്‍സിപ്പല്‍ പ്രൊഫ. ബി.കെ.ശോഭന അധ്യക്ഷതവഹിച്ചു. വൈല്‍ഡ്‌ലൈഫ് കോ-ഓര്‍ഡിനേറ്റര്‍ എസ്.ഗുരുവായൂരപ്പന്‍ ഉദ്ഘാടനംചെയ്തു. ചിറ്റൂര്‍ എസ്.ഐ. ജിജോ, ജനമൈത്രി പോലീസ് എ.എസ്.ഐ. രാധാകൃഷ്ണന്‍, പ്രൊഫ. മഹാലിംഗം, രവി എലപ്പുള്ളി, പ്രദീഷ്‌കുമാര്‍, ബിനീഷ് എന്നിവര്‍ സംസാരിച്ചു. കോളേജിലും പരിസരത്തുമായി ഇരുന്നൂറിലേറെ വൃക്ഷത്തൈകളാണ് പി.ടി.എ.യുടെ നേതൃത്വത്തില്‍ നട്ടുസംരക്ഷിക്കുന്നത്.

കാട്ടാനശല്യം: കരിവടത്ത് കൃഷി നശിച്ചു

Mathrubhumi Posted on: 07 Oct 2010

അഗളി: താവളത്തിന് സമീപം കരിവടത്ത് കാട്ടാനശല്യത്തെത്തുടര്‍ന്ന് വന്‍തോതില്‍ കൃഷി നശിച്ചു. കരിവടം സ്വദേശി കക്കിമൂപ്പന്റെ കൃഷിസ്ഥലത്താണ് നാശനഷ്ടമുണ്ടായിട്ടുള്ളത്.

ഇദ്ദേഹത്തിന്റെ 15 തെങ്ങിന്‍തൈ, 300 വാഴ, 250 മുകളില്‍ തൈ, അരയേക്കറോളം കരനെല്ല് എന്നിവയാണ് നശിപ്പിച്ചിട്ടുള്ളത്. തിങ്കളാഴ്ച രാത്രിയാണ് സംഭവം. ഇവിടെ മാസങ്ങളായി തമ്പടിക്കുന്ന രണ്ട് കാട്ടാന പ്രദേശത്ത് കൃഷിനാശം വിതയ്ക്കുകയാണ്.

ഒരാഴ്ചമുമ്പ് അഞ്ചോളംപേരുടെ ഏക്കറുകണക്കിന് കൃഷി നശിച്ചിരുന്നു. കാട്ടാനശല്യം രൂക്ഷമായിട്ടും വനംവകുപ്പിന്റെ നടപടിയൊന്നുമില്ലാത്തത് കര്‍ഷകരില്‍ പ്രതിഷേധത്തിന് കാരണമായിട്ടുണ്ട്.